Zulfiya Sherova: Muvaffaqiyatimning siri mehnatim va samimiyligimda

Hayotda yashar ekanmiz, jamiyatda o‘z o‘rnimizni topishga, atrofdagilarga namuna bo‘lishga intilamiz. Tadbirkorligi va chorvachilik tarmog‘ini rivojlanishi uchun mehnat qilayotgan, jamiyatda o‘z o‘rnini topgan tadbirkorlardan biri Zulfiya Sherova.

Zulfiya Sherova Sho‘rchi tumanida fermerlik harakati rivojiga katta hissa qo‘shayotgan, yerga egalikning afzalliklarini amalda namoyish etishga erishgan ilg‘or va tajribali fermer sanaladi. 2011-yildan buyon “Nargiza Sherova” fermer xo‘jaligi rahbari sifatida mehnat qilmoqda. U qishloq xo‘jaligi sohasida tajribali paxtakor sifatida tanilgan. Qolaversa, chorvachilikning eng asosiy tarmog‘i bo‘lgan qoramolchilikni rivojlantirishga harakat qilmoqda.

Tadbirkorning faoliyati, albatta, keng jamoatchilik uchun qiziq. Tadbirkorlikka qiziqqan ayollar va yoshlar ishtirokida o‘tkazilgan davra suhbatida tajribali va mas’uliyatli tadbirkor mehnat faoliyati, erishgan yutuqlari va muvaffaqiyatga erishish yo‘lidagi qiyinchiliklari haqida so‘zlab berdi.

-Har qanday ishda muvaffaqiyatga erishishning asosiy omillari izlanish, sa’y-harakat, mashaqqatli mehnat, eng asosiysi, omilkorlik bilan ish yuritishda, – deydi tadbirkor Z.Sherova. - Zimmamizdagi burch va vazifani sadoqat, fidoyilik va mas’uliyat bilan bajarishga harakat qilamiz. Mazkur uchrashuv tadbirkorlikni endi boshlagan, tadbirkorlikka qiziqqan yoshlarning tadbirkorlik borasidagi bilim va tushunchalarini boyitishga, biznesga bo‘lgan qiziqishlarini oshirishga xizmat qilsa, ajab emas.