Surxondaryoda azal-azaldan Navro‘zni xalq sayli sifatida tabiat bag‘rida nishonlab kelishadi.

Sariosiyo tumanida joylashgan harbiy qismda ham erta tongdan ushbu bayram tadbirlari milliy xalq o‘yinlari, sport musobaqalari, an’ana va qadriyatlarimiz bilan boshlandi. Bu yilgi Navro‘z shodiyonalari ham ana shu jihatlari bilan unutilmas bo‘ldi.

Bayram tadbirlarida harbiy xizmatchilarning oila a’zolari ham o‘zlarining bayram dasturxonlarini bezash va har bir viloyatning milliy taomlarini pishirish bilan bayram tadbirida ishtirok etdi.

Sariosiyo tumandagi korxona va tashkilotlar, mahallalar, ta’lim muassasalari harbiy xizmatchilarga o‘zlarining madaniy dasturlari, milliy hunarmandchilik mahsulotlari, urf-odat va qadriyatlarini namoyish qildi. Bahoriy taomlar tayyorlanib, elga ulashildi.

Keksalar yangi dehqonchilik mavsumi barakali kelishini tilab duolar qildi. Tuman madaniyat xodimlari badiiy va xalq jamoalari, san’at va madaniyat namoyondalarining chiqishlari sayl ishtirokchilariga zavq bag‘ishladi.
Navro‘z saylida tashkil etilgan sport musobaqalarida faol ishtirok etgan harbiy xizmatchilar va ularning oila a’zolari qo‘mondonlik tomonidan faxriy yorliq va qimmatbaxo sovg‘alar bilan taqdirlandi.