Навбатдаги онлайн қабулда 332 нафар фуқаронинг 362 та муаммоси тингланди

Вилоят ҳокими Улуғбек Қосимов ҳудудларда фуқароларнинг мурожаатларини тинглаш ва ҳал этиш самарадорлигини ошириш, уларнинг узоқ йўл босиб, сарсон бўлишларини олдини олиш мақсадида шаҳар ва туманлар студиялари орқали навбатдаги онлайн қабулини ўтказди.

Сариосиё тумани ҳокимлиги студиясида қарийб 4 соат давом этган қабулда ҳудудий студиялардан иштирок этган фуқароларнинг даволаниш, уй-жой олиш ёки қуриш учун субсидия олиш, йўлларни таъмирлаш, ишга жойлашиш, ўзини ўзи банд қилиш учун жиҳоз ажратиш, электр энергия ва ичимлик суви таъминоти, кадастр, мактаб ва мактабгача таълим тизимидаги муаммолар ва бошқа масалалардаги мурожаатлари масъуллар иштирокида тингланди.

Қабул давомида келиб тушган мурожаатларнинг 78 таси ҳал қилиб берилди. Ижроси муддат ва қўшимча ўрганиш талаб қиладиган 284 та мурожаат масъулларга йўналтирилиб, ижроси назоратга олинди.

Вилоят раҳбари ҳар бир мурожаат шахсан назоратида бўлишини таъкидлади ва мутасаддиларга йўналтирилган мурожаатларни масъулият билан ўрганиб, ҳал этиш чораларини кўриш топшириғини берди.